அருள்மிகு ஸ்ரீ
அன்னபூரணி சித்தர் திருவடிகள்

🌸 அன்னபூரணி சித்தர் யார்?

மதுரை மாவட்டம் செங்கப்படை கிராமத்தில் ஜீவசமாதி அடைந்து அருள்செய்யும் ஸ்ரீ அன்னபூரணி சித்தர் ஐயாவின் இயற்பெயர் பழனிச்சாமி என்பது செவிவழிச்செய்தி, பூர்வீகம் தெரியவில்லை.

ஐயா அவர்கள் 1963ம் ஆண்டு வரை காரியாபட்டி அருகில் மாந்தோப்பு கிராமத்தில் ஜீவசமாதி கொண்டுள்ள ஒரு சித்தர் கோயிலில் இருந்து தொண்டு செய்து வந்துள்ளார். அங்கிருந்து செங்கப்படை கிராமத்திற்கு வந்து இங்குள்ள சாவடியில் தங்கி காலை மாலை வேலைகளில் ஒரு மணி நேரம் சூரிய தியானம் செய்து நம் பகுதி மக்களுக்கு விபூதி கொடுத்து அவர்களின் பிரச்சனைகளுக்கு தீர்வு கொடுத்து வந்தார்.

தினமும் ஏழுவீடுகளுக்கு மட்டும் சென்று "அன்னபூரணி" என்று அழைப்பார். மேலும் கிடைத்ததை உண்டு மகிழ்ந்து வடலூர் வள்ளலார் பெருமானின் அருட்பெருஞ்ஜோதி மந்திரத்தை ஜெபித்து வருவார். இதனால் ஐயாவை எல்லோரும் "அன்னபூரணி தாத்தா" என்று அழைத்தார்கள்.

ஐயா அவர்கள் தான் ஜீவசமாதி அடைவதற்கு ஆறு மாதத்திற்கு முன்பே தான் முக்தி அடையும் தேதி நேரத்தை அறிவித்துவிட்டார். அவர் சொன்னப்படி 1973ஆம் ஆண்டு ஆனி மாதம் 28ம் நாள் வியாழக்கிழமை மாலை 4.15 மணிக்கு வளர்பிறை பிரதோஷம் அன்று கேட்டை நட்சத்திரத்தில் முக்தி அடைந்தார். அவர் சொன்னப்படி நம் ஊர் ஆற்றங்கரையில் நம் ஊரைப்பார்த்து தெற்கு நோக்கி அமர்த்தப்பட்டு அவருக்கு அந்த இடத்தில் சிறுபீடம் அமைக்கப்பட்டு வழிபாடு செய்துவந்தனர்.

அதன்பின் ஆனி மாதம் 24ம் தேதி (08.07.2025) கேட்டை நட்சத்திரத்தன்று தற்போது உள்ள அதிர்ஸ்டான ஆலயம் எழுப்பி கோபுர குடமுழுக்கு, குருபூஜையும் நடைபெற்றது. அதனை தொடர்ந்து ஒவ்வொரு மாதமும் கேட்டை நட்சத்திரத்தன்று சித்தர் ஐயாவின் லிங்க திருமேனிக்கு அபிஷேகமும் மற்றும் அன்னதானமும் நடைபெற்று வருகிறது. இன்றும் இந்த அற்புத ஸ்தலத்தில் அமர்ந்து நாடிவரும் அனைவருக்கும் நலமும், வளமும் வழங்கி வருகின்றார்.

இன்று ஆயிரக்கணக்கான பக்தர்களுக்கு இறைநம்பிக்கை, மன அமைதி மற்றும் ஆன்மீக வழிகாட்டுதலை வழங்கும் அருள் நிலையமாக இந்த திருத்தலம் திகழ்கிறது.